مفصل الفك من الحاجات ال بدأنا نسمع عنها كتير اليومين دول!
وده مش علشان المفصل ده جديد ولا حاجة لكن علشان آلام مفصل الفك
!أولا : مش بتعلن عن نفسها مباشرة! يعني حضرتك غالبا مش بتحس بالألم فوق نقطة محددة على الفك زي م بيحصل في وجع ضرسك أو عينك أو صباع رجلك الصغير مثلا، إنما الوجع ممكن يكون على شكل صداع مثلا، ممكن يكون على شكل ألم في الأذن، ألم مع البلع، آلام في الرقبة، ممكن يكون على شكل ألم في الأسنان وخصوصا الضروس الخلفية، ………… صور وأشكال كتيرة تانية من الألم ممكن تسببها مشاكل مفصل الفك.
ثانيا : علشان آلام الفك غالبا بتحصل بشكل تدريجي وعلى مدار شهور ويمكن سنين فحضرتك بتتعود (أو بتتعودي) عليها شوية ومش بنصدق ان الألم الشديد ال احنا فيه دلوقتي سببه الحاجات القديمة قوي والبسيطة ال كنا بنحس بيها من سنتين تلاتة فاتوا!
ثالثا: علشان غالبا بنتوجه لتخصصات تانية كتير قبل م نعرف ان المفصل ده له تخصص اسمه جراحة الفم والوجه والفكين، يعني لو الوجع على هيئة صداع هنلف على دكاترة الباطنة نشوف الضغط والعيون نظبط النضارات والأنف والأذن نشوف الجيوب الأنفية، ويمكن توصل للمخ و الأعصاب وغيره وغيره. لو الوجع جاي في الأذن يبقى أكيد هتبدأ بالأنف و الأذن، ولو مسمع في الرقبة ممكن تبدأ علاج طبيعي أو عظام، وهكذا لغاية م ربنا يكرمك وتقع ف إيد متخصص شاطر في جراحة الفم والوجه والفكين.
أنا هنا هقولك ببساطة ازاي تعرف ان مشكلتك في الفك وعلاجك عند متخصص في الفم والوجه والفكين:
1- لو الألم ظهر بعد خبطة في الوش أو محاولة كسر أو فتح حاجة جامدة بأسنانك يبقى تبدأ بدكتور جراحة الفم والوجه والفكين.
2- لو الألم بيزيد مع الأكل أو البلع أو الكلام يبقى تبدأ بدكتور جراحة الفم والوجه والفكين.
3- لو فتحة الفم أقل من الطبيعي يبقى تبدأ بدكتور جراحة الفم والوجه والفكين.
4- لو بتسمع صوت طرقعة وانت بتاكل أو بتتاوب أو بتفتح بقك لأي سبب يبقى تبدأ بدكتور جراحة الفم والوجه والفكين.
5- لو حضرتك في سن 16-20 سنة يبقى تبدأ بدكتور جراحة الفم والوجه والفكين.
6- لو أسنانك مش منتظمة و راكبة على بعض، أو عندك فك بارز (أو متراجع) عن التاني يبقى تبدأ بدكتور جراحة الفم والوجه والفكين.
7- لو مشكلتك ظهرت بعد جلسة علاج عند دكتور أسنان يبقى تبدأ بدكتور جراحة الفم والوجه والفكين.
(خصوصا لو جلسة العلاج طويلة)، ودي فرصة نأكد على الزملاء و الأبناء من أطباء الأسنان إن الزيارة لا يجب أن تتعدى 30-40 دقيقة، وفي حالة الضرورة نعطي المريض فرصة للراحة لمدة ربع ساعة على الأقل قبل معاودة العمل 30-40 دقيقة أخرى و أخيرة.
8- لو حضرتك “بتكز على أسنانك” سواء وانت نايم أو وانت صاحي يبقى تبدأ بدكتور جراحة الفم والوجه والفكين.
9- لو حضرتك معندكش مشكلة خالص، بردو تيجي نشوفك ونسعد بيك .
ألف ألف سلامة عليك وعلى كل حبايبك
ومتنساش أبدا إن “صحتك تهمنا … وعلاجك عندنا”
دكتور محمد أبو اليزيد
استشاري جراحة الفم والوجه والفكين
عضو كلية الجراحين الملكية البريطانية
Abolyazid Dental Centers 
You must be logged in to post a comment.